INKURU YA MELEKISEDEKI

Inkuru ya Melekisedeki na Aburahamu ninkuru ngufi cane ariko ibitsemwo ubutunzi bwinshi. Hari bike murivyo twofashanya kuraba mugisomwa bikadufasha.

Ibisomwa: ITANGURIRO 14 :17-24 ; n’Abaheburayo 7 :1-4.

Melekisedeki, ninde ?Ni vyinshi bivurwa kuri Melekisedeki ariko hari igipfungu cinshi kijanye n’inkomoko yiwe. Bamwe bakiyumvira ko yoba ari Kristo yambaye ishusho yumubiri kugira yiserure mw’Isezerano rya kera, nk’uko twakunda kubibona, aho yafata ishusho y’umumalayika (umumalayika w’Uhoraho). Ariko nivyiza gutahura Melekisedeki nka Yesu mu buryo bw’ikigereranyo nkuko tubisanga Abaheburayo 7 :3

Ibindi bikunda gutera ingorane n’arya majmbo avuga ko ata nkomoko yagira, ata se, ata nyina, ntidukwiye kubifata uko nyene vyanditse, ariko ico uyu mwanditsi ariko aragerageza kuvuga mur’iki gice cose n’ugutandukanye ingene abandi baherezi binjiye mw’ibango n’ingene Yesu Kristo yinjiye mw’ibango.

Melekisedeki hamwe na Kristo

Uko Melekisedeki  yinjiye mw’ibango ry’ubuherezi, birafitaniye isano n’ingene Yesu yaryinjiyemwo. Umuntu yaba umuherezi mu bayahudi kubera aho avuka, yaba ar’umwana w’umulewi gushika ku ruvyaro rwa Aroni. Iyi nsobanuro ya nta se nta nyina, vyasigura ko Melekisedeki atava mu muryango w’Abalewi. Ubuherezi bwiwe yabuhawe n’Imana bitarinze guca mu rukurikirane rw’uruvyaro rw’abalewi, nk’uko Yesu yitwa Umuherezi Mukuru kandi atanduruka mu muryango w’Abalewi. Melekisedeki yari umuherezi akongera akaba umwami w’igisagara c’i Salemu (arico Yerusalemu mu yandi majambo) aba igishushanyo ca Yesu Kristo azoza mw’Isezerano rishasha agakora aya mabongo ukw’ari abiri, yo kuba Umuherezi akongera akaba Umwami. Kuvuga ko Melekisedeki ata herezo afise ntibisigura ko yamaho ibihe vyose, kubera abaherezi barahabwa ibiringo kanaka. Igihe yari umuherezi, nta biringo yagira, co kimwe na Kristo n’ubu akiri Umuherezi kandi Umwami w’ibihe vyose.

El Eliyoni, Imana ya Melekisedeki na Aburamu

Mu guhezagira Aburamu, Melekisedeki akoresha ijambo El Eliyoni, Imana isumba vyose. Ritsindagira ingene Imana iri hejuru y’ubukuru bwose. Abaramu yari ahejeje kunesha abami bakomeye, intambara zananiye abandi bami we arazinesha akoresheje abanyerugo. Abandi bami baza kumusanganira n’igitinyiro, ariko mur’ico kirere c’ubukuru bwa Aburamu, Merekisedeki avuga kw’Imana ariyo isumba vyose. Iri hejuru ya Aburamu, hejuru y’ubukuru bwose n’icubahiro. Umurongo wa 20, Aburamu amuha ikigiracumi. Ikigiracumi tubona gitangwa ar’uko umuntu yatahuye ubukuru bw’Imana. Aburamu amaze kubwirwa ingene imana ariyo iganje vyose, abona yuko n’ivyo afise vyose atari ivyiwe. Ikigiracumi si ikintu umuntu atanga kubera ariko Bibiliya ibivuga ariko vyanduruka mu gutahura ukuntu Imana ariyo iganje vyose. Mw’Isezerano rishasha mbere ikigiracumi ntikinatsindagirwa kubera kw’Imana yiteze k’uwizera wo mw’Isezerano rishasha afise umuco wagutse, yakiriye Mpwemu yera kandi ariko araja mw’ijuru, ivyo vyose bigatuma yotanga ivyiwe vyose kubw’icubahiro c’Imana. Iyo ivyacu tubitanze kubw’Ubwami bw’Imana canke gufasha aboro, vyanduruka mu mutima wo kuyihimbaza kubera twatahuye ingene ari El eliyoni.

Aburahamu yanka kwakira ubutunzi bw’Umwami w’ i Sodomu nawe agacakoresha izina rya El Eliyoni Melekisedeki yakoresheje : Gereranya iyi mirongo 14 :19 na v.22. Yongerako Yehova imbere yiryo zina kugira yerekana kwimana ya Melekisedeki ariyo Mana nyene nawe yamwihishuriye. Kukwimana iganje ntakeneye kwiyandurisha inyungu atarizo zanduye. Iyo Mana ishobora kumutungisha kuko ariyo nyene vyose. Mbega ukwizera !