Ubugenzi canke ubucuti hagati y’abizera ni ikintu gikomeye cane, ariko hari igihe Abakristo batacitwararika ukwo bikwiye. Ivyo bishobora kuva ku kudatahura akamaro n’ikibanza cabwo. Uru rwandiko, rwisunga urundi rw’icongereza rwaciye ku rubuga DesiringGod, ruradufasha kuri ico kibazo

Kubantu basanzwe bafise akamere ko kwibako nkanje, sicoroshe kwemera ko DUKENEYE abagenzi. Aho niho Marsall Segal ahera. Uwo nawe numanditsi mwiza yandikira ishirahamwe rukristu, ryatangujwe na John Piper ryitwa Desiring God. (1). Iyumvire umugabo atagira abagenzi, umu pasitori atagira umugenzi, umupfasoni atagira umugenzi, umwigisha atagira umugenzi…Marshall Segal ati : imihamagaro yacu iyariyo yose dufise mubuzima yobamwo urudubi igihe atabagenzi.

Kugira ntarenze urugero, ngo yihave asanga yahaye ikibanza kirenze urugezo ubugenzi, aca yifashisha umwanditsi C.S Lewis nigitabo ciwe kizwi cane kubugenzi, Four Loves. Aho uwo nawe avuga ati: ubugenzi sikintu ntabanduka… twoshobora kubaho tudafise abagenzi. Ariko ubugenzi buhereza agaciro nuburyohe ukubaho kwacu.  Marshall Segal aca akoresha ijambo ribisobanura neza kurushiriza. ati: ubugenzi sintabanduka ariko ni kirumara. Atanga impamvu zibiri zikomeye zituma ubugenzi bwiza buba ikintu cakamaro cane mubuzima bw’uwizera.

Ubumaro bubiri bukomeye bw’ubugenzi.

Iki ni igihande ca mbere kiryoshe ca zino nyandiko. Cerekana ubwiza n’agaciro k’Imana birengeye ivyo umuntu ashobora kuraba ari wenyene. Uko dusangira uko turiko turayibona ni kwo tuyunguka…twunguka yo birushirije. Uko turabira Imana hamwe inyuma y’amezi, imyaka, ukw’igihe kigenda ciyongera, duca mu mibabaro, intsinzi, ukuneshwa no kunesha, mu migisha no mu bibazo, twisanga twafashanije kuraba iyo Mana biciye mu maso y’abagenzi bacu. Ubuzima bw’umuntu wese burafise ubushobozi bwo gucika akadirisha ducishirizamwo kuraba Imana. Marshall Segal aca avuga ko ari yo ntumbero y’Imana; kuzodukoraniriza hamwe mw’ijuru tuva mu moko menshi n’ibihugu vyinshi. Kazoba ari akaryo ko gusangira no guhanahana akanovera ibihe vyose ku kuntu umwe wese ariko abona iyo Mana.

Umusiguzi ati babiri basumba umwe. Iyo umwe aguye uwundi aramuhagurutsa. Abaza ati ‘ni nde muri twebwe yogize icavamwo iyo atahabona abagenzi?’ Ati tereza amaso inyuma urabe ivyo washoboye vyose, hanyuma raba hirya no hino iruhande yawe. Ubona iki? Uravye neza, ubona amashusho y’abantu bahabaye, babaye iruhande yawe. Ibihe bikomeye vyahinduye ubuzima bwacu si amashure, ibibanza canke ugutera imbere kanaka. Ariko ni ibihe Imana yakoresheje abantu kugira n’ivyo bindi bikunde. Aca arangiriza ku mpanuro ikomeye ati, ‘wifuza kumenya ubugenzi nyakuri?’ Rondera Imana n’umutima wawe wose, ntutinye kwishira mu kaga urondera kuyihesha icubahiro, hanyuma raba i ruhande yawe, wifatanye n’umuntu nawe afise uwo mutima, yiteguye kwiruka hamwe nawe muronderera hamwe iyo Imana.

(1) Iyi yandiko yanje nto yisunga ivyuwo mwanditsi Marshall Segal yavuze kubugenzi bwiza kuri runo rubuga: https://www.desiringgod.org/articles/you-still-need-good-friends